ده مستحيل . بقلم الشاعر القدير * سيد عبد العظيم
دا مستحيل...
إن اللي بنّا ينتهي بالشكل ده
وكأنه كان كدب وتضليل
إزاي قدرت بالسرعه دي
علي التغيير....
هو انت فاكر إني يوسف
وبسرعه راح ترميه ف بير
ولّا اني موسي هشُقّ بحر
عشان ماكونش وياك أسير
م انا ياما شوفت معاك كتيير
شربت ياما من قسوتك
وتوهت ياما ف سكتك
وصبرت علي ظلمك كتيير
كل أما أقرب..كنت تبعد
والشوق يزيد..ألقاك بتعند
قدمتلك روحي ومشاعري
وعشت ف الأوهام كتيير
كنت أما تزعل.. أجري واصالحك
وأخاف عليك..و أنحاز لصالحك
وبعّت كل الكون عشانك
وتبعّني كده من غير تفسير
طب كنت ليه بتدّي وعود
وإزاي خلفت كل العهود
دا انت طلعت سراب كبيير
انا مش بلومك أو اعاتبك
ولا تاني بحلم اكون بقربك
دا أنا قلبي ندمان إنه حبك
وبآسي م الوهم الكبيير....
تحياتي..سيد عبد العظيم
