يا صوت البلابل . بقلم الشاعر القدير * كرم ميخائيل
** يا صوت البلابل **
يا صوت البلابل
ومالك حزين
ومين إللي خلى
دموعك تسيل
وماليه عينيك
أهات الأنين
وتايه وضايع
فرحك لفين
*يا ضحكة ودابت
في وسط الدموع
يا زهرة ودبلت
يا دمع الشموع
يا شمس ونورها
أصبح شريد
ورافضة يكون
شعاعها وليد
*وطالبه تهاجر
تسافر بعيد
لدنيا لا فيها
خيانة وعذاب
ولا حتى فرقة
ولا يوم غياب
لدنيا تعيشها
الحياة من جديد
ويعلى جدارها
بإيد ويا إيد
*يا طير البلابل
يا طالب وداع
إياك يوم تهاجر
عشان إللي باع
إياك يوم تسيب
قلوبنا الحزينه
تعالى نرجَع
الفرح إللي ضاع
#كرم ميخائيل
