أنا شاعر . بقلم الشاعر القدير * هشام سليم
أنا شاعر نص نص
عميان معرفش أبص
لا شفت واحد يسرق
يتقاله ياسيدنا الشيخ
ولا شفت وزير ف وزارته
مابيفهم ف البطيخ
ولا شفت ف فرن طابور
وعراك علشان العيش
ولا قلت مبيكفيش
راضي وعايز أعيش
الفول مرة ف أسبوع
محدش بيموت م الجوع
وتكوسه رايحين جايين
اهي ماشية بالعداد
نركب من هنا للصين
ندفع جنيهين ياولاد
ياولاد ليه بس بنشكي
ع الفقر نقول ونحكي
العيشة اهي فل وعال
ويامكتر الأموال
وسؤال بيجر سؤال
القمح كتير ف بلدنا
واللحمة اهي ف أعيادنا
ولا شفت لابسة مقطّع
ف الشارع اهي تتمطّع
والشيشة اهي ف بؤها
والبودرة في خدها
ملعون اللي يقوللها
اتلمي يابت الناس
تردح وبإخلاص
وواد بصراحة مش عارف
إن كان واد أو بت
قاعد عاطل واهو صارف
فلوسه ياناس ع النت
كل ده مش شايف
اوعي تفكرني خايف
بص أنت بدالي بص
واسمي مسمعش حس
أنا شاعر نص نص
هشام سليم
كنج العربي
شاعر الحرافيش
الإسكندرية مصر
