خلاص بقيت ذكرى . بقلم الشاعر والأديب * سيد عبد العظيم
خلاص بقيت ذكري
وأنا لسه بحكيها
يعدي الوقت
وعايش كل معانيها
أنا فاكر كل رسايلك لسه
حتي رسالة(خلينا أصحاب)..
لو قولت نسيتها
هكون كداب
أنا فاكر كل كلام إتقال
حتي الضحكه
حتي دموعنا وقت الترحال
وفاكر كلمة ( آسف )
لما إتقالت منك
وقتها كنت لقلبي بضمك
ودموع سالت زي الأنهار
وأنا قلبي إنهار
أنا بس نسيت إزاى صدقت
يمكن علشان فهّمنى الوقت
و إنى إتغيرت كتير دلوقت
دا أنا حتى بقيت بشرب قهوه
من غير سكر
وبقيت دلوقتي أسهر بالليل
وافضل أفكر
أسهر لياليه
وافتكرك فيه
واحكي ياما عن أيامنا
وبقيت رغاى
ودخلت النار بعد الجنه
طب تيجى إزاى ؟؟
وحشانى نفسى فى أيامك
ووحشني كلامك وهيامك
وحشتني لمسه من إيدك
كنت بدوب فيها
وحشتني كلمه كنتي تقوليها
وقلبي إتعلق بيها
كلمة (بحبك)
كنت حاسس إنها
تجري في وريدك
و حاسس كل معانيها
كنت ساعتها بدوب في كيانك
من ساعة ما مشيتي وغيبتي
و أنا ولا عارف أعيش علشانى
ولا علشانك
لسه مافوقتش... غير دلوقتي
يعني خلاص..بقيتي ذكري
وأنا بكتبها أو بحكيها
والذكرى الأولى بقت تانيه وتالته
ببساطه ماعدتش بحسبها
انا حابب أنام ساعتين وأصحى
مالقيش أصلاً اليوم ده إتعاش
أو أعتبره حقيقي..ماجاش
أو إننا أرواح سارحه
لكن لسه ماتقابلناش
يمكن بكره نتقابل
أو نبقي حقيقه...وتتعاش
تحياتي... سيد عبد العظيم
