الشعر الأسمر . بقلم الشاعر القدير * هاني صالح عدس
والله وراح الشعر الاسمر
والأبيض بقه مالي الراس
حتى ملامحي بقيت تتغير
وبقيت بتلخبط في الناس
حاسس ان ذاكرتي ضعيفه
يعني بقيت بظهر محتاس
حتى ولادي بقت بتهزر
وتقولي يابا؛ انت عجوز
يابا امش بسرعه واتبختر
ولا خلاص ده معدش يجوز
بعمل اني ساعات مش فاهم
واضحك وانسى عشان ما ابكيش
واندم على لحظات عشناهم
كنا استاذه في التركيز
كنت انا احسن شاب في جيلي
حتى لما دخلت الميري
كنت في صاعقه وصوتي غليظ
كل الناس كانت بتهابني
والعضلات هي التمييز
كنت بشيل صاحبي على كتفي
من وحدتنا لحد الميز
كنت بكسر اي زميل
لو بيقولي كلام بيغيظ
واتجوزت وعشت حياتي
كنت مفكر أن شبابي
هيدم عمره وهبقا عزيز
بس ده حال الدنيا بنكبر
وهنتغير والعقل هيفقد تركيز
ومحدش على حاله بيبقا
كأس العمر مراره لذيذ
ملامحي
#الشاعرهاني_صالح_عدس
