قول على الدنيا السلام . بقلم الشاعرة والأدبية * مى محمد العطار
قول على الدنيا السلام
يلى بتقولو الزمن دا مفيش وحوش
شيلو القناع دا وشوفو الوشوش
وقت الهجوم مابيرحموش
والحق ضاع بين الزحام
طب قول على الدنيا السلام
عذرا يادنيا ارحمينى
كفايا غدرك لا تخونينى
أنا اتبرعت بدمع عيني
صدقة جارية ع الضحايا
لما اشوف وبعينى واحد
لحق أخوه بالنصب واخد
غدر عليه وبقلب جاحد
برافو عليك خدت الوسام
طب قول على الدنيا السلام
رضيت تبيع بالمال أخوك
كتر الفلوس مش هينفعوك
بكرا العيال مش هيرحموك
لما أكلوا م الحرام
ياعم قول ياللا السلام
وأما اب يبيع ولاده
بحجة الفقر اللى صابه
حتى الزمان لعنه وعابه
ازاى عنيك تقدر تنام
طب قول على الدنيا السلام
هيجرى إيه لو اكلتهم
عيش وملح وسترتهم
الخير هيكتر وسطهم
بعت الحنان جواك بكام
ماتقول على الدنيا السلام
ياللى لابسين الوشوش
جلد الوشوش اتهرى
الأصل فيكو مغشوش
حتى القناع اتبرى
سيبونى على حزنى أعزف
إحنا في واقع اصبح مزيف
والناس بقت وحوش تخوف
ورجلى بترجعنى تانى ورى
ياللي فاكر الحياه هتدوم لنا
أسأل فين اللى قبلك وقلنا
نلحق نخف ذنوبنا ونقابل ربنا
ونستغفر من العمر اللى ورى
كلمات : مى محمد العطار
