مهما كان . بقلم المطرب الشاعر / محمد حسن

مهما كان في بينا خلاف.. احنا علي بعضنا بنخاف.. 

احنا روح وايد وحدة.. وبلدنا كاملة الاوصاف.. 

ولو حد غريب دخل بينا.. او حتي حاول يفتنا.. هيقرب بينا مش يبعد... بكلام الله وبالسنة.. والحب جوة في قلوبنا لبلدنا اكبر اعتراف.. مهما كان في بينا خلاف.. 

اللي بتحصل بينا دي فتنة.. عايزة تفرق شعب اصيل.. والله يامصر لو حتي موتنا.. حبك جوانا اكبر دليل.. 

ليه ندي فرصة لاعادينا.. بعين قوية تشمت فينا.. لو كان احمد واللا مينا.. عمر بلدنا ماكانت فرجة.. 

صعب في يوم حاجه تفرقنا.. وكلمة مصر ياناس تجمعنا.. وتيجي شمسها وتودعنا.. من غير اي الآم او حرقة.. 

ياللا يامصريين بقي فوقو.. قبل مايفوت بينا الميعاد.. ليه الاغراب بقو فينا بيسوقو.. هو احنا عبيد؟؟ ده احنا الاسياد.. 

اللي بيحصل واللي بيجرا.. واخدين دم ولادنا متاجرة.. بس بلدنا دي اجمل شجرة.. مروية من دم شهيد... 

مين مصلحته يهد بلدنا.. او حتي يقتل في ولادنا.. غير حد عايز يبعدنا.. ويفرق الايد من الايد.. 

مصر دي شرطة وشعب.. وجيش ايد وحدة في كل الاوقات.. احنا نموت ومصر تعيش.. واحنا مش احسن من اللي مات.. 

هو ده المصري الاصيل.. اللي ارتوا من نهرالنيل.. عمره مايرضي يعيش ذليل.. او حتي يفرط في ترابها.. 

مصر مش ناسية اللي جرالها.. مين اللي صانها ومين اللي خانها.. مين اللي دمر فيها وهانها.. كل ده مكتوب جوة كتابها.. 

راسك فوق دايما مرفوعة.. بإسم كل المصريين.. وجوة كتاب الله مطبوعة.. ادخلوها بسلام آمنيين.. 

انتي نصرة للمظلوم.. وصوت للحق في كل يوم.. واللي يقول غير كده موهوم.. ولسه معرفش مين هي مصر.. 🇪🇬

احنا بإذن الله قادرين.. مسلمين ومسيحين.. بأمر من رب العالمين.. جاي ان شاء الله النصر... 

هحميكي يامصر وتحميني واوعي يامصري في يوم تخاف.. مهما كان في بينا خلاف... محمد حسن