بناكي أهم . بقلم الشاعر القدير / طه علي الدين
خاص بالمسابقه
قصيدة(بناكى أهم)
عاميه..
للشاعر..طه علي الدين
مصر_كفر الشيخ
،،،،،،،،،،،،،،،
تسيع الكل أحضانك
و ديمآ مابتصديش
و حاضنه الكل بحنانك
حتى اللى خانك
فيكى بيعيش
بياض الطيبه فى شراعك
مهما تقاسى اوجاعك
تنسى و لا بتقسيش
يوم مانويت على فراقك
كات واقفه الخطوه
ما بتمشيش
يافاتحه تملى ابوابك
مابترديش
قوليلى ياأمه إيه صابك
ليه ساكته مابترديش؟
ياامه فضفضة وقولى
لو حتى عليا هتلومى
ماتتكسفيش
د أنا اللى عاشقك من يومى
و الحزن تملى من كومى
ما ترفضنيش
كرهت الغربه و الترحال
مالقيتشى فى بعدك راحة بال
مايلزمنيش
بشربة مايه من نيلك
يزول الهم و اناجيلك
يطيب العيش
و يشب الحلم فى عيونى
يطوى شجنى و ظنونى
و اكونلك جيش
ميزانك كفه معدوله
و عدلك قال
ماتعيشى تانى مذلوله
فى إيد اندال
و اعلى طوبه فوق طوبه
غنا و ألحان
يا عايشه العمر محسوده
بطولة البال
يا صابره سلامه ع الآخر
على العزال
كتبته شعر بمشاعرى
و رسمتك تاج على شعرى
بكل دلال
لو ألمح دمعه على خدك
اكون يدك
و امسح خدك الباقى
م انا ابنك
و انا حبك
أنا الغنوه و انا الموال
وولادى اللى فى الغربه
هيمشوا السكه لوصعبه
و ييجوا يخضروا ترابك
بجهد و مال
ياعطيانا الامل و الزاد
و عامله مغمضه عيونك
عن الاوغاد
و ساكته على اللى بيخونك
ياقهراهم بفرعونك
جنود اوتاد
ياعود اخضر فى حضن الليل
تملى دليل
بيهدى بلاد
تعيشى تكيدى فى الاوباش
ياثوره باقيهالسه ماجاش
عند اللى قبضوا فيكى لأتمان
و باعوا عزتك ببلاش.
#طه_علي_الدين
