صباح الخير يا بلدي . بقلم الشاعر القدير / ابراهيم محمد رمضان
قصيدة بعنوان ( صباح الخير يابلادي )
مَن مِنا لايعشق بلدُه وتُراب بلدُه ويتمنيَ أن يعيش في بلدهِ ولايفارقُها ويُدفَن في تُرابها . وبَين الحين والآخر يُغازِلهُا ويتغزل فيها . أنا هذا العاشقْ الذي يعشق مصر وإسم مصر وأنا فخور بأنني مصري فهي
شرف وفخر لكل مصري ولهذا فأنا اتغزل فيها بهذه القصيدة
صباح الخير يابلادي
في عيون إبنك النهار نادي
وبينادي
ويقول والله ماليه
ولا حاسس بحنيه
غير في عينيكي يابلادي
وأنا ماسك بأيدية
كام شمعة تِنور لي
طريق واحد فاضل لي
لكني شايف جوايا
وإنتي ماشيه ويايا
ألف طريق
عليهم الورد والعنبر
بلون خدك الأحمر
من غير شك أقول إنتي
إنتي الغالية يابلادي
أمّر الصبح وأصبح
أشوف في عينيكي مَوالي
ياورد ِالجناين فتّح
وكام وردة لعمالي
وتحلالي
لقمة عيش وياكم
يا أبويا وأمي وعيالي
يا صناع بلدي ... يازرّاع بلدي
يا مين يقرأ ومين يكتب
ومين يسمع عن أحوالي
بأشوف فيكي يابلدي
عروسة لابسه توب وردي
وتاج الفل متندّي
عليه كام وردة بلون أحمر
ومتعطر
أشم الريحة وأقول
وأغنيلك وأدعيلك
يارب يا بلدي العمر يطول
صباح الخير علي عيونك
ربي يحرسك ويصونك
ولو سألوكي مين مجنونك
قوليلهم أنا المجنون
بجمالك أنا المفتون
أنا العاشق أنا الولهان
يا بلدي يا أهلي يا صحبة
يا مصر أنا دايب في ترابك
يا أمي أنا واقف علي بابك
ومستني تضميني
في حضنك زي زمان
أرجوكي ضميني
يا ست الكل دفيني
وخليني أعيش في أمان
صباح الخير من قلبي
ولو تعرفي سبب حبي
ولمين حبي
تقولي صحيح أنني إبنك
وبأحبك وبأخلصلك
ولو عمري هيفديكي
من نسمة هوا تكون ضدك
يهون عمري وأفديكي
وتعيشي إنتي أُلوف سنين
مع الملايين
وأشوفك حورية من الجنه
وأستني
تِمُري وأتباهى أنا بحُسنِك
ومين قَدِّك ولا زيك
ولا يتحدىَ الزمن مِثلِكْ
أنا من فرحتي ببلدي
بأمشي وأقول مين قدّي
أنا من مصر أنا مصري
وكان النصر ومين يدرّي
صباح الخير يابلدي
وتردي
صباح الخير يا ولدي
إبراهيم محمد رمضان )
( شاعر ومدير مالي بالإمارات )
