ابني . بقلم الشاعر القدير / حامد محمد السيد
(ابني)
ابني
حبيبي
ضنايا
كان يوم جميل
اووي لما عرفت
إني حامل
فيك
فرحت اووووي
والدنيا مكنتش
سيعاني
خلاص بقيت
جوايا ياواد
وفي قلبي
كمان
شيلتك
انا هكون
أمك ياواد
ومن دمي
ومن لحمي
وكمان
من عضمي
هغذيك
وهتسند
على الجدران
وهمشي
على مهلي
ومش هشيل
حاجة تقيلة
علشان
خاطرك
وياما تعبت
أوووي
وأنت جوه
بطني
بس كان تعب جميل
وكنت مبسوطة
وكنت بحس
بفرحتك جوايا
ولما كنت
تزعل ياقلبي
بكون طول الوقت
مهمومة
ومغمومة
أيوة كنت حاسة بيك
وكل الناس
بتدعيلي
ربنا معاكي
وكنت حاسة
إن ربنا
هيفرحني بيك
وهتشرف دنيتي
خلاص
أيام معدودة
ويوم ولادتك
ياقلبي
كان يوم عيد
وصلوا
الحبايب بيتنا
يباركولي أنا وأبوك
وكلهم فرحانين
أخوالك وخالاتك
وأعمامك وعماتك
وجه أبوك وبص
في عينيك
وباسك
وقال
ولي العهد حبيبي
وبحنيته شالك
وقالك
كنت تاعب أمك
ليه ياواد
فخدتك من أيد أبوك
ملهوفة ليك
وخدتك في حضني
وبوست ايديك
وحسيت بنفسك
وكمان نبضك
ياأجمل هدية
من ربنا
ربنا يخليك ليا
ولما تكبر
يارب نفرح كلنا
بفرحك
ويوم سبوعك
وطهورك
ودق الهون
وغربال وحلقاتك
ويقولوك
اسمع كلام أبوك
لكن أبوك زعق وقال
اسمع كلام أمك
اسمع كلام أمك
أنا ياحبيبي
اللي رضعتك
وحننتك وشيلتك
وضميتك لصدري
وطبطبت
على ضهرك
وياما حسيت بيك
وأنت صغير
وكنت أبص
في عينيك أشبع
وكمان كنت
حاسة أوووي
وجعك
وكل يوم بتكبر
أمام عيني
زي الزرع
الجميل
وكنت بحلم
بيوم
عرسك
وكانت فرحتي
كبيرة أووي
لما روحت
مدرستك
وشيلت شنطتك
ودفاترك
واقلامك
وكراستك
وكنت تودعني
ببوسة
على الخدين
وحضن دافي
وضحكة حلوة
على شفايفك
وكنت بحلم
بيوم تكبر
وتكون
سند ليا
وكان كل يوم
يمر عليا
أعشق فيه
ملامحك
كبرت ياقلبي
وبقيت
في الجامعة
وكلها أيام
وهتتخرج طبيب
قد الدنيا
بس خلي بالك
من الفقير
والغلبان
وأوعى تتأخر
في يوم
عن اللي
يحتاجلك
وكانت فرحتي
كبيرة أووي
لما قولتلي
ياماما
انا بحب
ونفسي أخطب
وعرفت كمان
إن البنات
بتعاكسك
حطيت عينيك
على مين ياقلبي
هنخطبلك
وهنجبلك
شبكتك
وكمان الشقة
والبدلة
ولعروستك
وهنزفك
ويوم فرحك
كان أجمل يوم
وساحت
دموع الفرح
وكانت
فرحتي كبيرة
لما خدتك
على صدري
وحضنتك
شد حيلك ياضنايا
انت وحبيبتك
علشان
نفرح بدستة
من عيالك
و في يوم
حسيت بتعب
بسيط
ياقلبي..
متخافش
انا كويسة
شوية صداع
وهبوط
وهيروحوا لحالهم
متشغلش نفسك بيا
وركز ياحبيبي
في شغلك
آآآآآه مش قادرة
تعبت أووي
وشكلي هودع
بس وصيتي
خلي بالك أوي
من نفسك
أقولك ياحبيبي
أنا شكلي
هقابل ربنا
بس والله
انا راضية عنك
تعال في حضني
أودعك ياأغلى
من حياتي
تعال يمكن
اخف لما أسمع
دقات قلبك
و نبضك
بس ابقي
ياحبيبي
ادعيلي
وودني
دايما
في تربتي
واكيد هكون
حاسة
وفرحانة أوووي
بزيارتك
مع السلامة
ياقلب ماما
ويارب ماأكون
في يوم من الأيام
تعبتك
حامد محمد السيد
٢٠٢١/٣/١٦
