دموع . بقلم أميرة الشعراء / أ . مشيرة النقيب
😢((( دموع )))😢
حيران معايا القلم
بيقولي أكتب إيه
وأخدت إيه م الألم
وإللي كتبته فيه
حبري دموع تترسم
بالحرف تبكي عليه
داب الورق وإتقطع
ولاعمر شئ يداويه
مخاصمني ليه يازمن
وعليا متغير
قولي بكام التمن
للبسمة تتصور
أفرح بكام وأحتِمِل
وعلى الفراق أقدر
قالي ماراح الأمل
والغير دا كان أشطر
وفين زمان الهنا
هجرونا أحبابنا
مهما احايلهم أنا
مايعدوا على بابنا
صعبان عليا الحبيب
لما الفراق صابنا
وإزاي جروحنا تطيب
لو يقسوا أحبابنا
قال القلم دول عجم
مايحسوا شكوتنا
ماشيين كراعي الغنم
ناسيين محبتنا
ولاحسوا قلب اتظلم
ولاحبوا لمتنا
واللهِ مااكتب لهم
لو م الفراق موتنا
بقلمي
أ. مشيرة النقيب
11/10/2020
