يا مقسم الأرزاق . للشاعر / إيهاب الجوهري
يا مقَسِّم الأرزاق
لِلِّي يقُوم مِن النُوم
وَقت الأدان يِدعِي
كان البعاد مَقسوم
و بَعد السَهر كام يُوم
إزاي هَقوم بَدري
مافيش فِ إيدي سَبيل
بَسهر لوقت طَويل
اناجيك فِ وِسط الليل
و الأمر يِستَدعي
إللِّي ف حِماك مَضمُون
و الصَعب عليك يهُون
أنا كُل خُوفي أكون
مَكتوبلي أموت وَحدي
و الجأ إليك و ادعِي
نَجِيني مِن الذِكرَى
جيتلك ف وَقت الجَد
تِحميني مِ الفِكرة
مِن قلبي بَدعي بجَد
أقوم سَليم بُكرة
يا مقسِّم الأرزاق
بالوَعد و الإتفاق
سَلِّمتلك أمري
أنا راضِي بالفُراق
لمَّا إتنَحَل وَبَري
و الصَبر ف قلبي ضَاق
و الشُوق قَسَم ضَهري
أنا يِمكِن كُنت بعيد
بَس النَهاردة أكيد
أنا جاي عَليك بَجري
يا مقسِّم الأرزاق
أنا صَاحي مِن بَدري...!
ehab algohre
