البيوت كانت عالتوب . كلمات / أبو القاسم الشاعر
البيوت كانت ع الطوب
ولا تشطيب ولا كهارب
وف كل حيطه الف شق
والشقوق فيها عقارب
والنومة كانت ع الحصير
والمخده جوز قوالب
وإن عطش القله جمبه
ولو جعان فيه عيش ورايب
ووسط البيت فيه (طرمبه)
وجوه حوضها فيه طحالب
والكانون والفرن بلدي
وماشيه الدنيا بالسبايب
حامد ربه ع اللى عنده
تقولش عمده ولا نايب؟
والاعمار كانت طويله
والمرض كان عنه غايب
والبيوت عمرانه حب
وعالركيه يتلموا القرايب
والنهارده بيته جنه
بس مليان بالمصايب
الفلوس والخير كتير
بس عدمان م الحبايب
والمرض مسايبش حد
والهموم مرار ودايب
والأعمار بقت قصيره
والراحة عليها ضرايب
